Frivillig arbeid

– Å seie ja til eit verv, om det er i politiske eller andre frivillige organisasjonar, er veldig viktig for den oppveksande slekt, seier Per-Arne Lillebø. Eit breitt kontaktnett var hendig i jobben som regionleiar i ein landsomfattande organisasjon som IOGT. Det er nett takka vere engasjementet for organisasjonsarbeid som har sytt for det store kontaktnettet. Verdien av organisasjonsarbeid handlar ikkje berre om det ein gir, men også det ein får. Tidvis kan det vere hektisk, men like fullt givande. Eit breitt kontaktnett er berre éin av gevinstane.

– Kunnskap. Venskap. Varierte arbeidsoppgåver. Du får heile pakken, og du tek det med gjennom heile livet, seier leiaren. Lillebø meiner ein går glipp av noko ved ikkje å engasjere seg i godt og førebyggande frivillig arbeid – om det så er IOGT, besøkstenesta, eit politisk parti, ein ideell organisasjon, eit korps eller eit idrettslag som treng kunnskapane dine. Han fryktar at til betre vi får det, til høgare vert terskelen for å bidra frivillig.

– I trongare tider har organisasjonsarbeidet ei oppblomstring, men i gode tider får folk velje frå øvste hylle. Eg ser ofte at det er problem å få folk til å engasjere seg. Folk har det godt på ulike måtar og er ikkje like villige til å engasjere seg i arbeid i frivillige organisasjonar som tidlegare, seier Lillebø og held fram: – I mi tid som leiar av Region Midt-Norge og arbeid i ulike organisasjonar og arbeid med Syskenbandet, var eg oppteken av kva det frivillige arbeidet ville gi meg og kva verdien har vore. Gjennom arbeidet i frivillige organisasjonar har eg møtt mange menneske som har gitt meg gode og rike minne som vil gi meg glede resten av livet.

Frivillig arbeid får offentleg støtte og godord frå helsehald. Folkehelsemeldinga frå 2015 kallar frivilligheit ei avgjerande kraft i samfunnet. Det manglar ikkje på oppmodingar om å ta del i frivillege organisasjonar. Det er sunt og givande både for den som deltek, og den organisasjonen ein arbeider for, seier Per-Arne Lillebø. Det fremjar trivsel, tilhøyrsle og demokrati og gjev betre helse. Funn i ei nordamerikansk undersøking publisert i Psychological Bulletin viser at frivillig arbeid to til tre timar i veka kan gi redusert depresjon, auka psykisk velvære og generelt betre helse. Undersøkinga syner at det frivillige arbeidet gir flest fordelar for eldre med kroniske helseplager.

Har du ikkje tid, tenkjer du? For dei fleste vil i botn og grunn dette gjelde: Alt du brukar tid på er prioriteringar, noko den tidlegare læraren og lokalpolitikaren Leif Hovde er inne på i eit tidlegare innlegg i Syskenbandet. Vi har like mykje tid som for nokre tiår sidan, då vi både rakk å slå av ein prat over nabogjerdet og rakk å engasjere oss i dei store folkerørslene som voks fram.

Er vi i ferd med å miste samhaldet og den personlege kontakten? Leif Hovde har ei oppfordring: For å bevare det frivillige arbeidet som limet i samfunnet, må organisasjonane våge å vere inkluderande, rause og opne. På den måten kan vi også bidra til å gjere eit samfunn prega av “sosiale medium” litt meir personleg.